పోలీసు యంత్రాంగం
గోదావరిఖని 2 టౌన్ పోలీస్ స్టేషన్ను వార్షికంగా తనిఖీ చేసిన పోలీస్ కమిషనర్ అంబర్ కిషోర్ ఝా, దుర్గమ్మ ఉత్సవాలకు పటిష్ట భద్రతా ఏర్పాట్లు చేయాలని, నేరాల నియంత్రణపై ప్రత్యేక దృష్టి సారించాలని సూచించారు. గోదావరిఖని 2 టౌన్ పోలీస్ స్టేషన్ను రామగుండం పోలీస్ కమిషనర్ అంబర్ కిషోర్ ఝా శుక్రవారం వార్షిక తనిఖీల్లో భాగంగా సందర్శించి, స్టేషన్ పనితీరును సమీక్షించారు. పోలీస్ స్టేషన్కు చేరుకున్న కమిషనర్కు గోదావరిఖని ఏసీపీ ఎం.రమేష్, గోదావరిఖని 2 టౌన్ సీఐలు ప్రసాద్ రావు, లింగమూర్తి మొక్కలను అందజేసి స్వాగతం పలికారు. అనంతరం పోలీస్ సిబ్బంది నుంచి కమిషనర్ గౌరవ వందనం స్వీకరించారు.
స్టేషన్ పరిసరాలను పరిశీలించిన కమిషనర్, పోలీస్ స్టేషన్ను ఎల్లప్పుడూ పరిశుభ్రంగా ఉంచాలని, రిసెప్షన్ సెంటర్కు వచ్చే ప్రజలకు మెరుగైన సేవలు అందించాలని సూచించారు. స్టేషన్లోని రికార్డులను పరిశీలించి, వాటిని క్రమపద్ధతిలో నిర్వహించాలని, కేసుల వివరాలను సీసీటీఎన్ఎస్లో ఎప్పటికప్పుడు నమోదు చేయడంతోపాటు సంబంధిత రికార్డులను ఆన్లైన్లో అప్లోడ్ చేయాలని ఆదేశించారు. పోలీస్ స్టేషన్ పరిధిలో నమోదవుతున్న నేరాలు, పెండింగ్ కేసులు, దర్యాప్తు పురోగతి, రౌడీషీటర్లు, హిస్టరీషీటర్ల కదలికలు, నేరాల నియంత్రణ చర్యలు, నిరంతర పోలీసు నిఘా, రాత్రి గస్తీ తదితర అంశాలపై సీఐని అడిగి వివరాలు తెలుసుకున్నారు. అనంతరం సిబ్బందితో మాట్లాడి వారి వ్యక్తిగత, శాఖాపరమైన సమస్యలను అడిగి తెలుసుకున్నారు.
త్వరలో నిర్వహించనున్న దుర్గమ్మ ఉత్సవాలు, ఊరేగింపుల సందర్భంగా ఎలాంటి అవాంఛనీయ సంఘటనలు జరగకుండా ముందస్తు ప్రణాళికతో పటిష్ట భద్రతా ఏర్పాట్లు చేయాలని కమిషనర్ ఆదేశించారు. ఊరేగింపుల సమయంలో శాంతిభద్రతలకు విఘాతం కలగకుండా నిరంతర నిఘా ఏర్పాటు చేయాలని, ట్రాఫిక్కు అంతరాయం కలగకుండా తగిన చర్యలు తీసుకోవాలని సూచించారు. నిబంధనల ప్రకారం డీజేలకు అనుమతి లేదనే విషయాన్ని ఉత్సవ నిర్వాహకులకు ముందుగానే స్పష్టంగా తెలియజేయాలని, నిబంధనలు ఉల్లంఘించే వారిపై చట్టప్రకారం చర్యలు తీసుకోవాలని ఆదేశించారు. పోలీస్ స్టేషన్ పరిధిలోని ఓపెన్కాస్ట్ గనులు, సింగరేణి బొగ్గు గనులు, పారిశ్రామిక సంస్థల భద్రతపై ప్రత్యేక దృష్టి సారించాలని కమిషనర్ సూచించారు. ఆయా ప్రాంతాల్లో నిరంతర నిఘా కొనసాగిస్తూ, సంబంధిత భద్రతా సిబ్బందితో సమన్వయం చేసుకోవాలని ఆదేశించారు. నేరాల నియంత్రణకు రాత్రి గస్తీని ముమ్మరం చేయాలని, సమస్యాత్మక ప్రాంతాలపై ప్రత్యేక నిఘా ఏర్పాటు చేయాలని కమిషనర్ సూచించారు. ప్రజల నుంచి అందే ఫిర్యాదులపై తక్షణమే స్పందించి, బాధితులకు న్యాయం జరిగేలా చర్యలు తీసుకోవాలని ఆదేశించారు.
అధికారులు, సిబ్బంది సమన్వయంతో పనిచేస్తూ కేసుల దర్యాప్తును వేగవంతం చేయాలని, నేరాలకు పాల్పడే వారిపై చట్టప్రకారం చర్యలు తీసుకుంటూ ప్రజలకు మెరుగైన పోలీసు సేవలు అందించాలని పోలీస్ కమిషనర్ అంబర్ కిషోర్ ఝా ఆదేశించారు.
