గోదావరిఖనిలో పోలీసుల సమాజ సంబంధాల కార్యక్రమం: వాహన తనిఖీలు, డ్రగ్స్ నివారణపై అవగాహన

గోదావరిఖని/పెద్దపల్లి: రామగుండం పోలీస్ కమిషనరేట్, పెద్దపల్లి జోన్ పరిధిలోని గోదావరిఖని వన్టౌన్ పోలీస్ స్టేషన్ పరిధి సప్తగిరి కాలనీలో గోదావరిఖని వన్టౌన్ ఇన్స్పెక్టర్ ఇంద్రసేనారెడ్డి ఆధ్వర్యంలో ఆదివారం సమాజ సంబంధాల కార్యక్రమం నిర్వహించారు. ఈ సందర్భంగా పోలీసులు కాలనీలోని ఇళ్లను తనిఖీ చేసి, నివాసితుల వివరాలను పరిశీలించడంతో పాటు, మాదకద్రవ్యాల గుర్తింపు కుక్కల విభాగం సహాయంతో తనిఖీలు నిర్వహించారు.

ఈ కార్యక్రమానికి గోదావరిఖని ఏసీపీ ఎం.రమేష్ ముఖ్యఅతిథిగా హాజరై కాలనీ వాసులతో మాట్లాడారు. శాంతిభద్రతల పరిరక్షణ, నేరాల నియంత్రణకు పోలీసులు చేపడుతున్న చర్యలను వివరించారు. కార్యక్రమంలో భాగంగా పోలీసులు 65 ద్విచక్ర, నాలుగు చక్ర వాహనాలు, 6 ఆటోలను తనిఖీ చేసి, వాటికి సంబంధించిన ధ్రువ పత్రాలను పరిశీలించారు. సరైన ధ్రువపత్రాలు లేని 15 వాహనాలను పోలీస్ స్టేషన్కు తరలించారు. సంబంధిత వాహనదారులు సరైన ధ్రువపత్రాలను సమర్పించిన అనంతరం నిబంధనల ప్రకారం వాహనాలను అప్పగిస్తామని, ధ్రువపత్రాలు సమర్పించని పక్షంలో చట్టప్రకారం తదుపరి చర్యలు తీసుకుంటామని పోలీసులు తెలిపారు.

ఈ సందర్భంగా ఏసీపీ ఎం.రమేష్ మాట్లాడుతూ, పిల్లలు మొబైల్ ఫోన్లను వినియోగించే విషయంలో తల్లిదండ్రులు ప్రత్యేక శ్రద్ధ వహించాలని సూచించారు. పిల్లలు తల్లిదండ్రులకు తెలియకుండా మొబైల్ ఫోన్లకు తాళాలు ఏర్పాటు చేసుకోవడం, ప్రత్యేక గదుల్లోకి వెళ్లి ఎక్కువ సమయం ఫోన్లో మాట్లాడటం, సామాజిక మాధ్యమాల్లోని దృశ్యాలను లేదా ఇతర అంతర్జాల విషయాలను అధికంగా వీక్షించడం వంటి అంశాలపై తల్లిదండ్రులు నిరంతరం పర్యవేక్షణ కలిగి ఉండాలని తెలిపారు. పిల్లల అంతర్జాల వినియోగాన్ని బాధ్యతాయుతంగా పర్యవేక్షిస్తూ, వారికి అంతర్జాల భద్రతపై అవగాహన కల్పించాలని సూచించారు.

కాలనీలో లేదా పరిసర ప్రాంతాల్లో గంజాయి, మాదకద్రవ్యాలు లేదా ఇతర అక్రమ కార్యకలాపాలు జరుగుతున్నట్లు అనుమానం కలిగితే, ప్రజలు భయపడకుండా వెంటనే 112కు సమాచారం అందించాలని ఏసీపీ కోరారు. సమాచారం అందించిన వారి వివరాలను గోప్యంగా ఉంచుతామని తెలిపారు. అక్రమ కార్యకలాపాలను ఎట్టి పరిస్థితుల్లోనూ ప్రోత్సహించకుండా, వాటి నియంత్రణలో పోలీసులకు సహకరించాలని ప్రజలకు సూచించారు. ఇళ్లను అద్దెకు ఇచ్చే యజమానులు, అద్దెదారుల పూర్తి వివరాలను సేకరించి నమోదు చేసుకోవాలని ఏసీపీ సూచించారు. వారి గుర్తింపు పత్రాలను పరిశీలించడంతో పాటు, వృత్తి, స్వస్థలం తదితర వివరాలను తెలుసుకుని రికార్డుగా ఉంచుకోవాలని తెలిపారు. అనుమానాస్పద వ్యక్తులకు ఇళ్లు అద్దెకు ఇవ్వకుండా అప్రమత్తంగా ఉండాలని కోరారు. నంబర్ ప్లేట్స్ లేకుండా లేదా అనుమానాస్పదంగా వాహనాలపై సంచరిస్తున్న వ్యక్తులు కనిపిస్తే, ప్రజలు అప్రమత్తంగా ఉండాలని సూచించారు. అయితే వారితో వాగ్వాదానికి దిగకుండా, వారు ఎవరిని కలవడానికి వచ్చారు, ఏ పని కోసం వచ్చారు, వాహనానికి నంబర్ ప్లేట్ ఎందుకు లేదనే విషయాలను గమనించి, అనుమానం ఉంటే వెంటనే పోలీసులకు సమాచారం ఇవ్వాలని తెలిపారు. ఈ-చలాన్లు లేదా ఇతర రహదారి ఉల్లంఘనలపై జరిమానాలు పడుతున్నాయనే కారణంతో వాహనాలకు నంబర్ ప్లేట్లు తొలగించి తిరగడం చట్టవిరుద్ధమని ఏసీపీ స్పష్టం చేశారు. ప్రతి వాహనదారుడు తప్పనిసరిగా హెల్మెట్ ధరించి, వాహనానికి సంబంధించిన అన్ని ధ్రువ పత్రాలను సక్రమంగా కలిగి ఉండాలని సూచించారు. రహదారి నిబంధనలు పాటిస్తే జరిమానాల గురించి భయపడాల్సిన అవసరం ఉండదని తెలిపారు. కాలనీలో ప్రజల స్వీయ రక్షణ మరియు నేరాల నియంత్రణ కోసం సీసీ కెమెరాలను తప్పనిసరిగా ఏర్పాటు చేసుకోవాలని సూచించారు. ప్రజల భద్రత, శాంతిభద్రతల పరిరక్షణ, నేరాల నియంత్రణకు పోలీసులతో ప్రజలు సమన్వయంతో పనిచేయాలని కోరారు. తమ పరిసరాల్లో అనుమానాస్పద వ్యక్తులు, వాహనాలు లేదా అక్రమ కార్యకలాపాలు కనిపించిన వెంటనే పోలీసులకు సమాచారం అందించాలని సూచించారు.