సింగరేణి కార్మికుల సంక్షేమంపై కేటీఆర్కు మాట్లాడే నైతిక హక్కు లేదు - ఎమ్మెల్యే రాజ్ ఠాకూర్

సింగరేణి కార్మికుల సంక్షేమం, అభివృద్ధి విషయంలో గత బీఆర్ఎస్ ప్రభుత్వ వైఫల్యాలను కప్పిపుచ్చుకునేందుకే కేటీఆర్ విమర్శలు చేస్తున్నారని రామగుండం ఎమ్మెల్యే, జిల్లా కాంగ్రెస్ పార్టీ అధ్యక్షులు ఎం.ఎస్. రాజ్ ఠాకూర్ అన్నారు. శుక్రవారం స్థానిక ఎమ్మెల్యే క్యాంపు కార్యాలయంలో నిర్వహించిన పాత్రికేయ సమావేశంలో ఆయన మాట్లాడుతూ, సింగరేణి కార్మికుల సమస్యలు, కాంగ్రెస్ ప్రభుత్వం తీసుకుంటున్న నిర్ణయాలు, బీఆర్ఎస్ నాయకుల వ్యాఖ్యలపై స్పందించారు. గత పదేళ్ల బీఆర్ఎస్ పాలనలో సింగరేణి కార్మికులకు ఇచ్చిన హామీలను నెరవేర్చలేదని, రామగుండం ప్రాంతాన్ని అభివృద్ధి చేయడంలో విఫలమయ్యారని విమర్శించారు. ఒకప్పుడు సింగరేణి కార్మికుల హక్కులు, తెలంగాణ ఉద్యమం గురించి మాట్లాడిన నాయకులు అధికారంలో ఉన్నప్పుడు కార్మికుల సమస్యలను ఎందుకు పరిష్కరించలేదని ప్రశ్నించారు. కేటీఆర్ రామగుండం పర్యటన సందర్భంగా చేసిన వ్యాఖ్యలను ఎమ్మెల్యే రాజ్ ఠాకూర్ తీవ్రంగా ఖండించారు. ఇతర ప్రాంతాలైన బెల్లంపల్లి, మంచిర్యాల, శ్రీరాంపూర్ నుంచి ప్రజలను తీసుకొచ్చి రామగుండంలో జరుగుతున్న అభివృద్ధిని చూసే అవకాశం కల్పించినందుకు కేటీఆర్కు ధన్యవాదాలు తెలిపారు. సింగరేణి కార్మికులను రెచ్చగొట్టి రాజకీయ లబ్ధి పొందాలని చూస్తున్నారని విమర్శించారు. కాంగ్రెస్ ప్రభుత్వం సింగరేణి కార్మికుల సంక్షేమానికి ప్రాధాన్యత ఇస్తోందని ఎమ్మెల్యే స్పష్టం చేశారు. కార్మికులకు 34 శాతం లాభాల వాటా అందించడం, మారుపేర్ల సమస్య పరిష్కారానికి చర్యలు తీసుకోవడం, సొంతింటి కలను నెరవేర్చేందుకు కృషి చేయడం వంటి అంశాలను ప్రస్తావించారు. డిస్మిస్ అయిన ఉద్యోగుల సమస్యపై గతంలో ఎవరూ తగిన శ్రద్ధ చూపలేదని, వారిని తిరిగి ఉద్యోగాల్లోకి తీసుకునే దిశగా కాంగ్రెస్ ప్రభుత్వం నిర్ణయం తీసుకుందని తెలిపారు. సింగరేణి కార్మికులకు కోటి రూపాయల బీమా సౌకర్యం కల్పిస్తున్నామని, కార్మికుల సంక్షేమమే ప్రభుత్వ లక్ష్యమని పేర్కొన్నారు.

గత బీఆర్ఎస్ ప్రభుత్వ హయాంలో విజిలెన్స్ కేసుల పేరుతో కార్మికులను ఇబ్బందులకు గురిచేసిన విషయాన్ని కేటీఆర్ గుర్తుంచుకోవాలని అన్నారు. ప్రస్తుతం కార్మికుల సమస్యలపై మాట్లాడుతున్న కేటీఆర్, గతంలో అధికారంలో ఉన్నప్పుడు వారి సమస్యలను ఎందుకు పరిష్కరించలేదో సమాధానం చెప్పాలని డిమాండ్ చేశారు. కార్మికుల త్యాగాలను, వారి కుటుంబాల బాధలను రాజకీయ ప్రయోజనాల కోసం ఉపయోగించుకోవడం సరికాదని రాజ్ ఠాకూర్ అన్నారు. సింగరేణి కార్మికుల పట్ల కాంగ్రెస్ ప్రభుత్వం అండగా నిలుస్తోందని, వారి సమస్యల పరిష్కారానికి నిరంతరం కృషి చేస్తోందని తెలిపారు. సింగరేణి ఎన్నికలను దృష్టిలో పెట్టుకొని కార్మికులను రెచ్చగొట్టే ప్రయత్నాలు చేస్తున్నారని విమర్శించిన ఆయన, కార్మికులకు వాస్తవాలు తెలుసునని, సరైన సమయంలో తమ నిర్ణయాన్ని వారు తెలియజేస్తారని అన్నారు. తెలంగాణ బీఆర్ఎస్ వర్కింగ్ ప్రెసిడెంట్గా కేటీఆర్ సింగరేణి కార్మికులకు క్షమాపణ చెప్పాలని ఎమ్మెల్యే రాజ్ ఠాకూర్ డిమాండ్ చేశారు. ముఖ్యంగా కార్మికుల సొంతింటి కల విషయంలో గత ప్రభుత్వం ఎందుకు స్పష్టమైన నిర్ణయం తీసుకోలేకపోయిందో ప్రజలకు సమాధానం చెప్పాలని ప్రశ్నించారు. సింగరేణి కార్మికుల సంక్షేమం, హక్కుల పరిరక్షణ, వారి కుటుంబాల భవిష్యత్తు కోసం కాంగ్రెస్ ప్రభుత్వం చిత్తశుద్ధితో పనిచేస్తుందని ఎమ్మెల్యే రాజ్ ఠాకూర్ స్పష్టం చేశారు. మా ప్రాంత ప్రజల కష్టార్జిత సొమ్ముతో సిరిసిల్ల, సిద్దిపేట ప్రాంతాలను అభివృద్ధి చేసుకొని, రామగుండం ప్రాంతాన్ని మాత్రం నిర్లక్ష్యం చేసి బొందలగడ్డగా మార్చిన ఘనత గత బీఆర్ఎస్ ప్రభుత్వానిదేనని తీవ్రంగా ఆరోపించారు. తెలంగాణ మలిదశ ఉద్యమంలో ప్రాణత్యాగం చేసిన కాసోజు శ్రీకాంతాచారి మీకు గుర్తుకు రాలేదు కానీ, గోదావరిఖని బిడ్డ, మా తమ్ముడు, ప్యారడైజ్ డైరెక్టర్ శ్రీకాంత్ ఓదెల గురించి మాత్రం మాట్లాడుతున్నారని ఎమ్మెల్యే రాజ్ ఠాకూర్ వ్యాఖ్యానించారు. తెలంగాణ ఉద్యమానికి తన జీవితాన్ని అంకితం చేసిన గద్దర్ అన్న మరణించినప్పుడు ఆయన అంత్యక్రియలకు కూడా మీరు హాజరు కాలేదని విమర్శించారు. తెలంగాణ కోసం పోరాడిన ఉద్యమకారులను, వారి త్యాగాలను గౌరవించడం ప్రతి ఒక్కరి బాధ్యత అని పేర్కొన్నారు. ఉద్యమకారుల కుటుంబాలకు అండగా నిలవాల్సిన అవసరం ఉందని, కాంగ్రెస్ ప్రభుత్వం వారి త్యాగాలను గుర్తించి, వారికి అండగా ఉంటుందని ఎమ్మెల్యే రాజ్ ఠాకూర్ స్పష్టం చేశారు. ఈ సమావేశంలో నగర మేయర్ మహంకాళి స్వామి, డిప్యూటీ మేయర్ పాతపల్లి ఎల్లయ్య, సీనియర్ నాయకులు, కార్పోరేటర్లు, నాయకులు పాల్గోన్నారు.