పేదల పక్షాన నిలిచిన ప్రజా నాయకుడు పండుగ సాయన్న: కలెక్టర్ కోయ శ్రీహర్ష

పేద ప్రజల పక్షాన నిలిచి, అణగారిన వర్గాల కోసం పోరాడిన ప్రజా నాయకుడు పండుగ సాయన్న అని జిల్లా కలెక్టర్ కోయ శ్రీహర్ష అన్నారు. గురువారం పండుగ సాయన్న జయంతి సందర్భంగా, సమీకృత జిల్లా కలెక్టరేట్లో ఆయన చిత్రపటానికి జిల్లా కలెక్టర్ కోయ శ్రీహర్ష పూలమాల వేసి ఘనంగా నివాళులర్పించారు.

నిజాం పాలనకు వ్యతిరేకంగా పోరాటం

జిల్లా కలెక్టర్ కోయ శ్రీహర్ష మాట్లాడుతూ, నిజాం పాలన కాలంలో ప్రజలను దోపిడీ చేస్తున్న దొరలు, దేశ్ముఖ్లు, అధికారులు, సంపన్నులకు వ్యతిరేకంగా పండుగ సాయన్న పోరాటం చేశారని తెలిపారు. పేద ప్రజలకు అండగా నిలిచి, సంపన్నుల వద్ద ఉన్న ఆస్తులను పేదలకు పంచిపెట్టినందుకు ఆయన తెలంగాణ రాబిన్హుడ్గా ప్రసిద్ధి చెందారని పేర్కొన్నారు.

బహుజన రాజ్యాన్ని స్థాపించే ప్రయత్నం

పండుగ సాయన్న కేవలం సంపన్నుల నుంచి ఆస్తులను తీసుకొని పేదలకు పంచిపెట్టడానికే పరిమితం కాకుండా, ఆనాటి నిజాం పాలనలోని అధికార వ్యవస్థను ప్రశ్నించి, అధికారులను ఎదిరించారు. తనదైన పాలనా వ్యవస్థను ఏర్పాటు చేసుకొని, సమాజంలో అణగారిన వర్గాలకు న్యాయం జరిగేలా సరికొత్త బహుజన రాజ్యాన్ని స్థాపించేందుకు ప్రయత్నించారు.

చరిత్రలో చిరస్మరణీయం

ఆధిపత్య శక్తులైన దేశ్ముఖ్లు, కరణాలు, పటేళ్లు, భూస్వాముల కుట్రల కారణంగా పండుగ సాయన్న నిజాం ప్రభుత్వ హయాంలో హత్యకు గురయ్యారని ఆయన చరిత్రను స్మరించుకున్నారు. ప్రజల కోసం పోరాడిన పండుగ సాయన్న జీవితం, ధైర్యసాహసాలు తెలంగాణ చరిత్రలో చిరస్మరణీయమని పేర్కొన్నారు.

పండుగ సాయన్న వీరోచిత పోరాట గాథను నేటికీ దర్శనం మొగులయ్య వంటి జానపద గాయకులు 12 మెట్ల కిన్నెరపై ఆలపిస్తూ ప్రజలకు చేరవేస్తున్నారని తెలిపారు. ప్రజల కోసం పోరాడిన మహనీయుల చరిత్రను భావితరాలకు తెలియజేయాల్సిన అవసరం ఉందని అన్నారు.

ఈ కార్యక్రమంలో డీఎస్సీ డిఓ రవీందర్, జిల్లా సహకార అధికారి శ్రీ మాల, కలెక్టరేట్ ఏవో బండి ప్రకాష్, జిల్లా అధికారులు, సంబంధిత అధికారులు, బీసీ సంఘాల నాయకులు, తదితరులు పాల్గొన్నారు.